Disko aipamenak 2003-2005

08001-RAVAL TA JOIE

08001 RAVAL TA JOIE (Organic records)

Bat, bi, hiru, lau... zenbakiak leku guztietan. Edonora begiratzen duzula ere zenbakiak topatuko dituzu. Zenbakiak baldintzatuta bizi gara. Banketxera joan eta aurpegira begiratu aurretik karnetaren zenbakia eskatuko dizute. Zenbat urte dituzu? Zein urtetan bizi gara? Zenbakiak komunikabideetan eta zenbakiak inkestetan, zenbakiak manifestazioan eta zenbakiak ordenagailuan, 010101... Zenbakiak hotzak omen dira, zuzenak batzuetan okerrak besteetan. Zer ordu da? Buff, berandu nabil. Garestia edo merkea da zenbakiaren arabera, kilometro askotara dago eta horregaitik... ez edo bai. Paradisura iristen saiatzeagatik hildakoen zenbakia geroz eta haundiagoa da baina guri etorkinen zenbakiak kezkatzen gaitu. 08001 zenbakian Chab Samir, Lyricson, Aziz, Adlen, Abdelaziz eta gainantzeko ipar afrikar europar katalandar gaizkileen sentimenduak entzungo ditugu. Deitu orain eta entzun harretaz.

ARITZ SOUND SYSTEM

AFRIKA-Entzun

AFRIKA "Entzun" (Metak)

Pauso bat lehen, beste pausoa gaur eta hurrengoa bihar. Bidea pausoz pauso egiten da eta Euskal Herriko altxor musikala aberasteko bidean pauso berria eman da Afrikaren diskaren kaleratzearekin. Gehienontzat Etsaiak taldearekin egindako elkarlanagatik ezaguna bada ere, azken urteotan, proiektu desberdinetan aritua da. Ke Rule reggae taldearekin, Keurekin batera edota Rudo & Friends Sound System izen bitxia duen house musika oinarri duen proiektuan abeslari aritu da Afrika. Orain berriz, Israel Monzoncillo eta Ernesto Maestroren produkzioaren laguntzaz R&B, soul, reggae, drum&bass kutsuko diska goxoa osatu du. Estilo horietan ohikoa den izotz teknologikotik ihesi hezur haragizko musikarien berotasuna bilatu du, haize sekzioa eta guzti (Fermin Muguruza eta Kontrabandakoak tartean). MeShell Ndegeocello edo Jean Paul `Bluey Maunick bezalako maixuen bidea jarraitzea ez da errexa izango baina saiatu gaitezke. Zergatik ez? Afrikaren diska kalean da eta orain, Euskal Herriko txokoak bereganatuko dituen zuzenekoa prest dute. Eta zu? Euskal arimaren dardara jasotzeko prest zaude? Gozatu.

ARITZ SOUND SYSTEM

AFROCELTS-Seed

AFROCELTS "SEED"

Mugak apurtu. Nork dio musikan guztia asmatuta dagoela? Nork dio erritmo berdinak entzuteaz aspertuta dagoela? Sentitzen duenak ezagutzen du dio atsotitzak. Musikarekin sentitzeari utzi diozu? Diska guztiak berdin iruditzen zaizkizu? Utzi negar egiteari eta bilatu ezazu. 1996ean `Sound Magic arri bitxia kaleratu zutenean eskema asko apurtu zituzten. Technoa zeltiar melodiekin eta afrikar perkusioekin? Nola liteke? Orain laugarren diska kaleratzen dute. Ezer berririk ez, eta? Ederra. Musikaren etorkinak munduko txoko guztietara zabaltzen ari dira eta guk etxeko ateak zabal zabalik ditugu. Ongi etorriak!

ARITZ SOUND SYSTEM

AK-Pozoina Zabaltzen

AK Pozoina Zabaltzen (Dena Pikutara prod.)

Hopkor. Hip-Hop eta hardcore doinuen nahasketatik sortutako estiloa. Bazan euskaldunok musikan izen ponpoxak asmatzen hasteko garaia. Nahasketa ordea ez da berria eta urteak dira rap musika eta harcorea uztartuz musika egiten dela. Dena den, bi estiloen arteko harreman honetan rap-ak ez du inoiz merezitako parekotasunik lortu eta hardcorearen bidai lagun izan ohi da. AK taldea Mattin, Peio, Mathieu eta Jonek sortu zuten 2000. urtean Beskoitzen (Ipar Euskal Herria). Hardcore eta metal doinuak inspiratuta hasi ziren 2001. urteko ekainean, Iparkor kolektiboaren estreinaldi jaian Lyongo Dj Alf ezagutu arte. Honek ekarri dizkie raparen influentziak eta berarekin batera sortu dute M.A.K. taldea, osotasunean rap musikari eskeinitako proiektua. AK bezala, Iparkor izeneko bilduman parte hartu dute eta orain, hamabi kantuz eta CD-romerako bideoklip batekin osatutako maketa kaleratu dute. Hitzak oso militanteak izan arren ez dugu ikaskuntzarik emateko, ezta moralik egiteko; baina saiatzen gira galdera batzu pausatzea, ta batzutan eria ezartzea min egiten duen zaurian. Kontzertuak emateko irrikitan daude. www.pozoina.clan.st

ARITZ SOUND SYSTEM

AKATZ-12 AÑOS DE EXITOS

AKATZ 12 AOS DE EXITOS (Brixton records 2004)

Orain aurkezten dugun Akatzen lehen diska hau ez da Akatzen lehen diskoa. Kontraesana dirudi ezta? Euskal Herrian jamaikar doinuak lantzen dituzten taldeen artean ohikoak dira kontraesanak. Taldea 1992an Bakion sortu zenetik gora behera asko jasan ditu partaide kopuruari zein kaleratutako materialari dagokionez . Berez, taldeak lau diska ditu baina guztiak autoprodukzioak izan dira, maketa edo Cd promozional gisa kaleratutakoak eta horretaz gain, lau diska bildumetan parte hartu dute. Orain aurkezten dugun diskoa diskoetxearekin kaleratzen duten lehena da. Tontakeria dirudien hau Euskal Herrian jamaikar doinuak lantzen dituzten taldeen ezaugarrian bilakatu da eta musika honek bizi duen egoeraren adierazgarri da zoritxarrez. Hamabi urte igaro dira diskoa baldintza duinetan kaleratu arte eta tarte horretan, Akatzek kantu propioak osatu eta zuzeneko borobila lortu du. Diskoa urte guzti hauetan egindako lan gogorraren emaitza da eta hori lehen entzunalditik nabari da. Zorionak Akatz.

ARITZ SOUND SYSTEM

AREA RESERVADA-Area reservada 3

ASKOREN ARTEAN "Area reservada 3" (Universal)

Area Reservada Antonio Fernandezek zuzentzen eta aurkezten duen irrati saioa da. Jazz
musikaren mugak gainditu eta jazzaren erroetatik edaten duten musikak eskeintzen ditu,
egunero, arratsaldeko 14:00etatik 15:00etara. Area Reservada, Espainiar Estatuko irrati
publikoan, musika espezializatuari eskeinitako Radio 3 irrati katearen barruan egiten
den saioa da baina, irratiaren eremua gainditu eta irratsaioan entzun daitezken
musikekin osatutako diska bilduma kaleratu berri dute, hirugarrena dagoeneko.
Aurrekoetan bezala, lehen eta oraingo soul, jazz, funk kantuak jaso dituzte; David
Sanborn, Ramsey Lewis, Incognito, Roy Hardgroove, Diana Krall eta abar. Area
Reservada eta Radio 3 espainiar estatuko uhinen basamortuan oasia dira,
komertzialtasunaren sargorian iturri freskoa. Euskal Herriko "autonomi erkidegoan"
Egin Irratiaren iturria indarrez itxita eta irrati libreen iturriaren mugak kontutan hartuta,
zre egingo ote dugu komertzialtasunaren sargoriak ito ez gaitzan? Iturri berriak behar
ditugu, kanpotik ekarri gabe, bertako baliabideak erabilita, musika zaletuon egarria
modu duin batez hasetuko duen ur freskoa behar dugu. Tresna egokiak eskutan hartuta
bada garaia eguzkiaren dizdirak itsutu gabe zuloa egiten hasteko. Topa.

ARITZ SOUND SYSTEM

ASKOREN ARTEAN-BASSLINE PRESSURE

ASKOREN ARTEAN BASSLINE PRESSURE Mixed by Mj Cole (Muzik)

Zer dute amankomunean Chicken Lips, audio Bullys, Roots Manuva, Artful Dodger, Dj Hype, Wayne Smith...eta bilduma honetan agertzen diren gainantzeko musikari eta abeslariek? Zer dute amankomunean house, techno, breakbeat, reggae, dancehall, rap, hip-hop eta uk garage estiloak lantzen dituzten lagun guzti hauek? Erantzun posibleak: 1) Baxuarekiko maitasuna. 2) Mj Cole musikari ezagunak maixuki nahastutako sesio batean azaltzen direla. 3) Muzik aldizkariaren azkenetako alearekin batera banatzen den konpaktoan azaltzen direla. 4) Borrokan odol asko isuri eta gero azkenean Euskal Herrian maiztasunez konpakto bat kaleratzen duen aldizkari bat izango dela eta aurrez aipaturiko guzti horiek aldizkari horretako diska sesio bilduman parte hartzeko irrikitan egongo direla eta gainera, Euskal Herrian beraien zuzenekoak eta sesioak ikus-entzun ahal izango ditugula aurki. Baxuaren dardarek ez zaitzatela zorabiatu!

ARITZ SOUND SYSTEM

ASKOREN ARTEAN-Basque Planet

Askoren Artean Basque Planet (Wagram)

Wagram, Frantses estatuan dagoen disketxe independiente garantzitsuenetakoa da eta gure artean, guk behintzat horrela ezagutu genuen, musika elektronikoaren inguruan kaleratzen dituen diska sesio/bildumengatik ezaguna (Hotel Costes, Barfly...). Euskal Herrian egiten den musikak interesa piztu du Wagramekoen artean eta hemen egiten den kantuekin osatutako bilduma egitea erabaki dute. Horretarako, Fermin Muguruzarekin harremanetan jarri eta bere esku utzi dute diskako kantuen aukeraketa lana. Emaitza, hemeretzi kantuekin osatutako bilduma da, Ferminen gusto pertsonalen arabera eratua eta hasiera batean Euskal Herritik kanpoko entzuleei begira egina. Azpimarratzekoa da estilo aldetik duen aniztasuna (reggae, dub, ska, rap doinuetatik rock eta triki doinuetara doa), sesioa izan ez arren hasieratik amaierarate koherentzi haundiko sesio modura antolatua dagoela, euskaraz egindako kantuak direla (eta hau oztopoa beharrean ikur bilakatu daitekeela) , disketxe haundi eta txikietako kantuak daudela eta Euskal Herrian egiten den musikak gutxienez atzerrian egiten den musika bezain ona (eta askotan hobeagoa) dela erakusten duela. Guztiaren gainetik ordea, kanpoan hemen egiten denagatik interesa dagoela (eta ez bereziki komertzialki errentagarria delako) eta bertako taldeak, promozio egokiarekin kanpoan arrakasta izan dezaketela erakusten du. Euskal musika buruan eta ibili munduan...


ARITZ SOUND SYSTEM

ASKOREN ARTEAN-Brazilian Love Affair 4

Askoren Artean "Brazilian Love Affair 4" (Far Out)

Maitasun kontuak. Hamasei urte zituela Joe Davis Londongo gazteak bere bizitzako maitasuna izango zena ezagutu zuen. Hasieran harremana ez zen batere errexa izan, London hiritik 9.000 kilometroetara dagoen Rio De Janeiro koa zen maitea eta ezineskoa egiten zitzaion nahi adina maitearekin egotea. 1986. urtea zen eta garai hartan harremana importazio bidez mantendu behar zuten, oso garesti beraz. Egoera jasan ezinik behar aina diru bildu eta Brasilerako txartela erosi zuen Joek. Maitalearekin batera Far Out izeneko etxea eraiki eta bertan eman dituzte azken urteak. Seme alaba ugari dituzte orain, etxean bertan jaiotakoak batzuk (Patricia Marx, Sabrina Malheiros, Democustico...) eta seme hartutakoak besteak (Joyce, Marcos Valle, Ed Motta...). Garaiak aldatzen doaz eta garai berrietara primeran moldatzen jakin dute. Zoriontsu bizi dira orain, indartsu eta osasuntsu hezitako semeak mundu osoan ezagunak dira eta edertasun horrekin gozatzen dugu askok. Brazilian Love Affair izeneko sendiliburuarekin familia osatzen duten partaideak ezagutzeko aukera dugu orain. Perfektuegia ote egia izateko?

ARITZ SOUND SYSTEM

ASKOREN ARTEAN-British hustle

ASKOREN ARTEAN "British hustle" (Soul Jazz records)

Britania Haundia. Zergatik diote Britania haundia dela lurralde aldetik horren txikia denean? Eta zer da Britania Haundia? Haundia diote materialki aberatsa delako? Historian zehar munduko hainbat herri indarrez menperatu dituelako? XV. mendean espainiarrek hasitako esklabutzarekin jarraitu zutelako? Esklabu horien izardi eta odolarekin aberastu delako? Parekotasun asko dago AEB eta Britania Haundia deitzen duten horren artean. Musikalki begiratuta ere, lotura haundia dago bi inperioen artean. Komunitate afroamerikarra eta afroingelesa lengusuak dira eta musika aldetik harreman estua izan dute beti. Jazz eta funk doinuak AEBetako ghettoetan jaio baziren ere laster zabalduko ziren munduan zehar eta eragin berezia izan zuten komunitate afroingelesaren artean. Soul Jazz disketxe apartak kaleratu berri duen bilduma honetan Britania Haundia deitzen duten horretan 1974 eta 1982 urte artean egindako jazz, funk, soul eta disco harribitxiak entzun daitezke; The Real Thing, Atmosfear, Beggar and Co., FBI eta abarrek eskainita. Arimarentzat elikagaia.

ARITZ SOUND SYSTEM

ASKOREN ARTEAN-Chill House 11

ASKOREN ARTEAN Chill House 11 (Choice)

Musika adituek diotenez house musika 70. hamarkadan horrenbesteko arrakasta izan zuen disco musikaren eboluzioa da. Definizio sinplea izanda ere erritmo eta izpiritu aldetik antzekotasunak dituztela ezin uka. Disco musika, dantzalekuei zuzendutako musika bezala definitzen da eta egia da, disco musikarekin izerdi asko bota dutela askok. Dena den, nola aldatzen diren gauzak. House musikaren zuhaitzean adar ugari daude, bakoitzak bere berezitasunak ditu eta erritmoaren abiadurari dagokionez soilik aldaketa ugari daude. Garai batean dantza erritmoak zirenak orain Chill Outerako omen dira; hau da, gauaren amaieran, festaren azken txanpan, hodei artean infernuaren berotasunaz dantza egindako gorputzen bihotz kimikoak abiadura moteldu dezan lagunduko dion egoera. Erlaxatzeko musika. Ambient eta techno ikutuko house doinuak? Instrumentalak gehienak. Gau osoan, egun atseginak, ilargi azpian, gauean, maita nazazu eta espinaka neska bezalako izenburu sakonak dituzten Agoria, H-Foundation, Llorca, Nooncat eta Hipp-e talde/musikari/DJ/ekoizleen kantu sorta. Goiza atseginaren jendeak aukeratuta eta nahastuta.

ARITZ SOUND SYSTEM

ASKOREN ARTEAN-Fabuloso Groovin

ASKOREN ARTEAN FABULOSO GROOVIN (Vampisoul)

Latin soul, latin jazz, latin funk... deitu nahi duzuen modura baina jartzen zaizkion izenen gainetik 70. hamarkadan New Yorkeko ghettoetan sortutako musikak deabruarena baino erakarpen ahalmen haundiagoa du. Bizimodu bila iritsitako etorkin latinoek jaioterriko erritmoak eraman zituzten eta bertan, afroamerikarren jazz, soul eta funk doinuekin nahastuta inoiz egin den musika zoro eta dantzagarrienari eman zion sorrera. Ray Barreto, Willie Bobo, Joe Batan, Eddie palmieri edota Sly Stone eta last Poets dira, beste askoren artean, erritmo eta musika estiloen nahasketa hau landu zutenak eta emaitza diska honetan dastatu daiteke. Estatuko Vampisoul zigiluak argitaratu du.

ARITZ SOUND SYSTEM

ASKOREN ARTEAN-Favela chic 2

ASKOREN ARTEAN "FAVELA CHICK 2" (Fla Flu Production)

Jakina da Brasil munduko herrialde musikalenetakoa dela. Jakina da Brasilen, inguruko herrialde gehienetan bezala, lurra eta gainontzeko aberastasun materialak gutxi batzuen esku daudela. Jakina da Brasilen, futbola eta musikagatik ez balitz, iraultza aspaldi egina zutela eta dirudienez, gauzak dauden moduan, Lula egonda ere, iraultzak luze joko duela. Jakina da batucada, samba eta bossa nova direla Brasilgo musika ezagunenak baina, ba al dakigu Brasilen munduko edozein musika estilo bereganatzeko aparteko trebezia dutela? Berdin dio nungoa edo noizkoa den. AEBetako beltzen soul, funk, jazza edo rapa, jamaikarren reggaea, folka, popa edota musika elektronikoaren house, drum &bass eta jungela, berdin dio. Beste edozein txokotan kopia hutsa izango zena brasildarrek berea egiten dute. Orain badakigu. Ez dut Brasilen iraultza ospatzeko abestu eta dantzatuko duten musika entzun gabe hil nahi.

ARITZ SOUND SYSTEM


Epaile jainko aditu adiktoak dio: 4

ASKOREN ARTEAN-Fkw 016

Askoren Artean Fkw 016 (Frikyiwa)

Nork esango lioke Frederic Gallianori duela hamar urte musika elektronikoaren mundu konplexuan murgiltzen hasi zenean, disketxe propioa sortuko zuela. Ametsa zena egin bihurtu zen 2000. urteko martxoan eta dagoeneko hiru diska kaleratu ditu bere bizitzako pasio haundiak diren afrikar musika, jazza eta musika elektronikoarekin. Jazz musikaren barruan esperimentaziorako duen joeragatik ezaguna afrikar musikaren erakargarritasunagatik maitemindu eta orain, afrikar doinuak mundu osora zabaltzeko asmoa du Gallianok. Horretarako, musika elektronikoaren apaindura ezarri eta horrela, diska berri honetan, Hadja Kouyate et Ali Boulo Santo, NGou Bagayoko, Filifin eta beste afrikar taldeen musika Jeff Sharel, Luciano edo Tokyo Black Star bezalako makinazaleek bernahastuta entzun dezakegu. Emaitza house, techno, jazz eta hip-hoparen jantzi elektronikoa duen afrikar arima eta ahotsak. Afrikar musikariak tutore zurien eskuetatik aldendu eta tresna guztiak bere esku dituztenean sortuko duten musika entzuteko irrikitan gaude.

ARITZ SOUND SYSTEM

ASKOREN ARTEAN-Get up stand up

ASKOREN ARTEAN GET UP, STAND UP (Universal)

Gureak egin du! Birus arriskutsu batek kutsatu gaitu! Nola liteke multinazional batek zerbait txukuna egin duela pentsatzea? Kezkatzen hasiak gara. Urteak daramagu The Best of Reggae, Reggae Classics, eta horrelako izenburu originalekin kaleratutako reggae bildumak ikusten. Ustezko prezio merkeak eta bi edo hiru konpaktoz osatutako kutxatilan azaltzen diren talde piloak erakartzen zaitu. Gaztea zara, xoxik gabe zaude eta talde berriak ezagutzeko izugarrizko gogoa duzu. Nola ez duzu ba horrelako aukera aprobetxatuko?. Txolloa erosi eta portada terrible hori estaltzen duen plastikoa kenduta inungo informaziorik ez dakarren orriarekin topatuko zara, diska jarri eta kotxean urteak daramatzan aitaren zinta zaharrak baino soinu kaxkarragoa duen grabazioarekin topatuko zara eta gainera, ustezko reggae izenaren azpian, betunarekin beltztutako pop komertzialaz osatutako kantuekin egiten duzu topo. Kaka zaharra! Bilduma honetan portada terriblearen eta informazioarik gabeko orrialdearen azpian, zentzu onean, klasikoak diren reggae kantuak topatuko ditugu behintzat. Reggaearen unibertso aberatsa arakatzen hasi berriak direnentzat aproposa.

ARITZ SOUND SYSTEM

Epaile jainko aditu adiktoak dio: 4

ASKOREN ARTEAN-Groovy vol 6

ASKOREN ARTEAN "GROOVY VOL.06" Irma Records

Italia. Erromatar inperioa. Berlusconi eta mafia, mafia eta Berlusconi. Spaghettia, pizza eta futbola. Pisa, pizza, soula eta jazza. Mama mia! Soula eta jazza? Oker zaude lagun. Soula eta jazza AEBetako beltz afroamerikar oso beltzen gauza da, nigga. Luca Trevisi ez dirudi beltza denik, ezta? Bost axola! Eta bigarren parteak ez omen dira inoiz onak izan, ezta? Entzun arretaz: Bolognan sortu baina London eta New Yorken egoitzak dituen Irma disketxeak kolore guztietako beltzek izen desberdinekin bataiatutako Afrikan egindako sentimenduzko musika jaso du gure gozamenerako. Eta dagoeneko sei atal kaleratu dituzte. Ulertzen? Ez. Ea honela esanda: A collection of rare jazzy club tracks selected by Luca Trevisi (LTJ Xperience). Orain bai? Kezkatuta nago.

ARITZ SOUND SYSTEM



Epaile jainko aditu adiktoak dio: 4

ASKOREN ARTEAN-HAUL AND PULL UP SELECTA

ASKOREN ARTEAN HAUL AND PULL UP SELECTA (TROJAN)

Gutxi dira 30 urtetik gora irauten duten disketxeak eta Trojanen kasuan, reggae musika kaleratzen badute miraria dela esan daiteke. Jamaikar musikaren `mamutzar (zentzu guztietan) haundia izandako Duke The Trojan Reid ek 60. hamarkada hamaieran sortua, Treasure Islek kaleratutako singelak Ingaleterran zabaltzeko asmoz sortu zen. Urteetan gora behera haundiak izan ditu eta jabe ugari izan eta gero Sanctuary Records multinazionalaren esku dago orain. Trojanen artxiboetan jamaikar musikaren altxor izkutuenak gorde dira eta altxor horien berrargitalpenei esker iraun du urteetan zehar. Trojanen jabe berriak altxor horiek kupidagabe ustiatzeari berrekin dio eta txurroak bezala kaleratzen dituzten bildumen azkenetakoa da hau. 1979-82 urte artean reggae sound systemetan entzun eta dantzatu ziteken musika aurkituko dugu, `dancehall bezala ezagututakoa eta formato luzean (12 kaleratutakoa). Barrington Levy, Barry Brown, Scientist... Ezinbestekoa.

ARITZ SOUND SYSTEM

ASKOREN ARTEAN-Hi fidelity lounge 4

ASKOREN ARTEAN Hi:Fidelity Lounge. Volume 04 (Guidance)

Definizio altuko loungea. Zer arrazoi esan nahiko dute horrekin? Norbait gogoratzen ote da trip-hop delakoaz? Bere garaian chill outerako musika zana geroago downtempo, easy listening eta orain lounge da. Ez du zentzu haundirik ezta? Musika, estiloetan banatzea ulergarria izan daiteke, zertaz ari garen ulertzeko erreferentzi modura balio dezake baina antzekotasun haundiak dituen musikari, horren denbora tarte laburrean, horrenbeste izen ponpox ezartzea helburu komertziala besterik ezin du izan. KK. Orain, zertaz ari garen argiago dugula Lounge izenpean kaleratutako bilduma hauetan atzera begira jarritako erritmo elektroniko goxoak aurkituko ditugula esango dizuegu (posible ote? Gu ere, izen ponpoxoak jartzen). Hobe genuke txorakeriak idazteari utziko bagenio... Guidance disketxearen zigilua duen bilduma honetan, besteak beste; Bonobo, The Funky Lowlives, Organic Grooves, Tosca, Zeb eta Blue States aurkituko ditugu. Lasai hadi.

ARITZ SOUND SYSTEM

ASKOREN ARTEAN-Latin hop

ASKOREN ARTEAN LATIN HOP! (Dro East West)

Batek: Kaka! Multinazional zikin hauei xoxak nondik atera besterik ez zaie axola eta horretarako estiloak asmatzea besterik ez zaie bururatzen. Mestizoaren fruituak zuku gehiago ematen ez duenez, orain, estatuan rapa modan jarri dela eta, rap latinoaren edo latinhop delakoaren etiketa asmatu dute eta izenburu horren pean lehen bilduma kaleratu dute. Zihur diru mordoa emango diela eta orain, abeslari famatu guztiek rapeatu bat sartuko dutela kaleratzen dituzten disketan. Besteak: Ze ona! Rap musika oinarrian hartuta Cuba, Chile, Brasil, Colombia, Venezuela edo Argentina bezalako herrialdetako kultur ezaugarriak gehitu eta hip-hop musika ulertzeko modu berria sortu da. Anglosajoien monopolioarekin apurtu eta estiloen arteko nahasketarekin erritmo berriak sortzen ari dira. Disfruta ditzagun!. Eta zuk? Zer uste duzu? (erantzuna ez da derrigorrezkoa).


ARITZ SOUND SYSTEM


Epaile jainko aditu adiktoak dio: 4

ASKOREN ARTEAN-Mama tribe

ASKOREN ARTEAN MAMA TRIBE

Ehunka diska bilduma kaleratzen dira urtero; disketxeen katalogoko taldeak direla, diska jartzaile famatu baten sesioa dela e.a. Gutxi dira ordea, gai baten inguruan osatzen direnak eta gutxiago oraindik, guk dakigula behintzat, amatasuna gai bezala hartzen dutenak. Muzik Tribe disketxeko lagunek gai hori aukeratu dute Mama Tribe izeneko bilduma osatzeko eta bertan, hainbat reggae abeslarik ikuspuntu oso pertsonaletik aztertzen dute gaia. Bilduman entzun daitezkeen abeslari zein musikari gehienak estatu frantsesean bizi dira eta gaur egun herrialde horretan reggae musikak duen indarraren erakusle dira. Hauetaz gain, nazioarte mailan ezagunagoak diren reggae izar haundiak ere aurki daitezke (Sizzla, Capleton, Tony Rebel...). Amatasuna alderdi biologikotik aztertzen dute batzuk eta beste batzuk berriz, Afrika ama lurra buruan dutela, esklabutza garaiak, beltz izatearen harrotasuna eta Afrikarako itzulera dute gogoan.

ARITZ SOUND SYSTEM

ASKOREN ARTEAN-NOVA LATINO 03

ASKOREN ARTEAN "NOVA LATINO 03" (Ocean Drive)

Eguzkia, palmondoak, itsasoa... paradisuaren irudi klasikoa (norentzat?). Baina ba al da paradisurik musikarik gabe? Latino moods & brazilian beats, horrela aurkezten dute bilduma honetan entzun daitekeen musika. Itzulpen kaskarra eginez brasildar doinuen eragina duten erritmo elektronikoak direla esan daiteke. Karibeko irudi topikoa erabili arren bilduman parte hartzen duten gehienak europearrak dira eta karibea argazki eta telebistan ikusi dute soilik. Kuriosoa ezta? Eguzkia, palmondo eta itsasoaren irudia duten diskek gehiago saltzen dute agian? Nork daki. Nova Latino izenarekin kaleratzen duten hirugarren bilduma da eta aurrekoetan bezala brasildar eta latindar erritmoen eragina duten kantuak entzun daitezke, beti ere europear musikarien ikuspegitik egina (Gare Du Nord, Ian Pooley, Hacienda, Can 7, Zuco 103, Mo Horizons...). Kantu originalak batzuk eta originalen nahasketa bereziak besteak. Kalitatea eta komertzialtasunaren arteko oreka?.

ARITZ SOUND SYSTEM

ASKOREN ARTEAN-Natty Dread Sampler

ASKOREN ARTEAN Natty Dread Sampler

Natty Dread, guk ezagutzen dugula behintzat, Europa mailan, reggae musikari eskeinitako aldizkari onenetakoa izango da, onena ez bada. Gaur egun egiten den kalitatezko reggaea ardatz hartuta eta reggaearen historia aberatsa ahaztu gabe, musika estilo honek merezi duen seriotasunaz lantzen da; elkarrizketak, erreportaiak, diska kritikak, albisteak, kontzertuen agenda... Diseinu landua, kalitatezko inprimaketa eta kolorez. Guzti hori gutxi balitz, ale bakoitzarekin batera diska bilduma bat banatzen dute eta bertan, kaleratu berri diren nobedadeekin batera, kantu zaharrak ere uztartzen dituzte beti ere aldizkariaren edukiekin zerikusi zuzena dutenak. Abendu-urtarrileko alean Tony Rebel & Morgan Heritage, Garnett Silk, Yasus Afari & Freddie McGregor (azken hau hemendik gutxira Euskal Herrian egongo da kontzertua eskeintzen; otsailak 20 Biarritz-21Gasteiz), U-Roy...
Frantsesez beharrean euskeraz izango balitz... Natty Dread, 31 Rue Paul Bert, 94130 Nogent.

ARITZ SOUND SYSTEM

ASKOREN ARTEAN-Nova Soul II

Askoren Artean "Nova Soul II" (Audiopharm)

Soul. Horrela izendatutako musikari buruz hitzegitean zer datorkigu burura? Otis
Redding, Aretha Franklin, Marvin Gaye, Sam & Dave eta antzeko abeslariak dira
normalean musika estilo horrekin erlazionatzen ditugunak. 60-70. hamarkada eta
maitasun balada goxoak. Topikoak. Musika guztiekin gertatu bezala, soularekin ere,
asko dugu oraindik ikasteko. Alemaniako Audiopharm zigiluak kaleratzen dituen Nova
Soul bildumekin, gaur egun egiten den soularen mugak zabaldu nahi dira. Urteetan
aldatzen eta eboluzioanzten joan den musika honen alderdi komertzialenetik aldendu,
R&B delakotik alegia, eta soularen mugak noraino zabaltzen diren aztertu nahi du.
Teknologi berrien eragina eta beste musika estiloekiko maitasun harremanak emaitza
ugari eman ditu; James Hardway, Mr. Scruff, Frank Popp Ensemble, Freddie Cruger,
Shaun Escoffery eta bilduman azaltzen diren gainantzeko maitaleek arimarekin,
sentimenduz egindako musikari soula deitzea bigarren mailako zerbait dela erakutsi
digute.

ARITZ SOUND SYSTEM

ASKOREN ARTEAN-RODIGANS 25TH ANNIVERSARY

ASKOREN ARTEAN "RODIGANS 25TH ANNIVERSARY"

David Rodigan jainkoa da reggae musikan. Gurea bezalako azal zuria du eta gu bezala, jamaikar musikaren zaletu amorratua da. Munduko reggae bilduma haundienetakoa omen du eta zihur, guk baino KD eta binilo gehiago dituela. KISS 100 irrati komertzialean egiten du saioa igandero eta zihur, Molotoff Irrati librean ditugunak baino entzulego gehiago dituela. Londongo Dingwalls areto ospetsuan `pintxatzen du astezkenero eta munduko txoko askotan ibilia da sound systemak antolatzen; gu berriz, gaztetxe, txosna eta taberna zikinetan ibiltzen gara. Musikaz bizi da eta guri berriz, musikak, boltsikoetan zuloak besterik ez dizkigu eragiten. Guk zintak eta CD-Rak izkutuan lagunen artean banatzen ditugun bitartean Rodiganek multinazional batekin kartoizko kutxa eta luxuxko liburuxka duen diska bikoitza kaleratu du eta barruan, dagoeneko klasikoak diren reggae kantu komertzial piloa jaso du. Eskerrak amonak `guapoagoak, altuagoak eta azkarragoak garela esaten digun bestela...

ARITZ SOUND SYSTEM

ASKOREN ARTEAN-SaintGermain des Pres Cafe 3

ASKOREN ARTEAN Sant-German-des-Prs Caf III (Wagram)


Atalka kaleratzen diren diska bildumei bildurra dioten lagunak lasai egon daitezke. Parisko Sant-German kafetegi ezagunaren aitzakipean kaleratzen diren bilduma-sesioen azken ale hau aurrekoak bezain ona da, hobeagoa ez bada behintzat. Aurreko bi aleetan egin bezala, oraingoan ere, gaur egun musika elektronikoa eta jazza elkartzen dituzten eskeintza interesgarrienak aukeratu eta sesio modura nahastu dituzte. Askotan entzun ditugu jazz klasikoaren, `garbiaren, zaletuak horrelako elkarketengaitik kexuka. Zihur gaude Nuspirit Helsinki, Truby trio, Infracom, Eric Pierre edota bilduma hauetan jasotzen diren edozein talderen musika entzungo balute iritziz aldatuko luketeela, askok bai behintzat. Gauza batek kezkatzen gaitu ordea, horrelako maila altua lortu eta gero posible izango ote da aurrerantzean maila hau mantentzea? Hau bai erronka latza musikarientzat. Musika dotorea zer ote den galderari erantzuna aurkitu diogu.

ARITZ SOUND SYSTEM

ASKOREN ARTEAN-SaintGermain des Pres Cafe 4

Askoren artean SaintGermain-des-Prs Caf IV (Wagram)

Drogak. Onak ala txarrak dira? Legalak ala ilegalak? Onak badira zergatik dira (batzuk) ilegalak? Eta txarrak badira zergatik dira (batzuk) legalak? Droga guztiak berdinak dira? Eta nik, zer dakit drogen inguruan? Drogei buruz hausnartzerakoan haur batzuk egindako galderak dira (beste askoren artean). Galdera gehiago. Kafea droga da? Nerbio sistema kitzikatu eta dependentzia sortzen du? Eta droga bada zergatik da legala? Kafearekin negozioa egiten da? Nork ateratzen dio etekina kafeari? Eta orain musikarekin. Musika droga da? Nerbio sistema kitzikatu eta dependentzia sortzen du? Musikarekin negozioa egiten da? Nork ateratzen dio etekina musikari? Eta kafea eta musika batera hartzen badira? Eta kafea, U.F.O., Nicola Conte, Zuco 103, Koop, Kruder & Dorfmeister, Slow Train eta antzeko taldeen musikarekin hartzen bada zer? Zaila bazirudien ere, Saint-Germain-des-prs-Caf-ko trapitxeroek nu jazz deitzen dutenaren potentzia areagotzea lortu dute eta orain guztion esku jarri dute. Eskerrak kaferik hartzen ez dugun...

ARITZ SOUND SYSTEM

ASKOREN ARTEAN-Sambass

ASKOREN ARTEAN SAMBASS (Cuadra/Irma)

1992. London hiriko auzo txiroetan jamaikar etorkinen hirugarren belaunaldia erritmo kutxa merkeen abiadurekin jolasten hasten da. Porlanezko ohianean musikaren eboluzioak ez du naturaren logika errespetatzen eta raggamuffin garraxiekin zipriztindutako junglelak abiadura zoroan auzoak zeharkatu eta , denbora tarte oso laburrean, hiri osoa bereganatuko du. Aurrean topatutako estiloak irentsi eta bereganatzeko trebezi izugarria du eta ez du atsedenik. Drum & bass, UK garage, two step, hardcore... denborarekin indarra galdu eta zurrunbiloan itotzen ari dela dirudi; hiria txikia geratu zaio eta ustel usaia dario. Inork espero ez zuenean ordea berpiztu egin da; brasilgo ohian amaigabeak edaten eman dio eta arnastutako aize freskoari esker indar berriturik bueltatu da. Fededunok! Makurtu gaitezen Sambass jainkoaren aurrean! Samba, bossanova eta jungle/drum&bassaren arteko akelarrea hasi da eta ez diogu gonbidapenari ezetz esango.

ARITZ SOUND SYSTEM

ASKOREN ARTEAN-Sonar 2003

ASKOREN ARTEAN SONAR 2003 (Vale music/Sonar music)

Duela hamar urte musikazale askok estatuan musika jaialdi erraldoirik ez zegoela eta kexu ziren. Hamar urte hauetan perretxikuak baino azkarrago hazi dira jaialdi erraldoiak. Nagusi diren musika estiloekin osatu dira, ezagunak eta famatuak diren taldeen izen haundiz osatutako kartel haundiei esker. Denborarekin ohikoak bihurtu dira eta masiboak, oso jendetsuak, jendetsuegiak agian. Hauetako askok, banketxeen antzera, urteroko irabaziak (jende kopurua) haunditzea izan dute helburu, kosta ala kosta. Sonar izenekoa estatu mailan aintzindarietakoa da eta urteroko jende kopurua haunditzea lortu arren eskeinitakoaren maila altua mantentzea lortu du. Musika elektronikoaren sukarra epeltzen ari dela dirudi orain baina Sonarek berean dirau eta azken urteotan egin bezala, iazko jaialdian parte hartu zuten hainbat artisten musikarekin osatutako diska bikoitza kaleratu du. Gaur egun egiten den eta oraindik zer ote den argi ez dugun musika elektronikoa delakoaren izpilu.

ARITZ SOUND SYSTEM

ASKOREN ARTEAN-TOLOSALDEA MUSIKAZ PIZTUZ

ASKOREN ARTEAN TOLOSALDEA MUSIKAZ PIZTUZ (Autoekoizpena)

Zorionak Tolosaldea Musikaz Piztuz ekimena. Zorionak, baliabide murritzekin, zailtasunak gainditu eta Tolosaldeko hainbat talde gazte eta berrien musika bildu eta diska osatzeagtik. Zorionak, helburu ekonomikorik gabeko ekimena aurrera ateratzeagatik eta moda eta pentsamendu bakarraren gainetik estilo desberdinetako musikak elkartzeagatik. Zorionak, soldata eta diru trukearen garai hauetan militantziaz, ilusioz eta lan haundiz gauzak aurrera atera daitezkeela erakusteagatik. Zorionak Amezketa, Ibarra, Anoeta eta Sanblaspiko gaztetxe eta gazte asanbladako jendeari horrelako zerbait egiteagatik eta zorionak azkenik, diskan parte hartu duten talde eta artistei. Eskerrak gauza asko hobetzeko dauden eta lan asko egin beharko den oraindik. Bidea luzea izango da, ez etsi beraz.


ARITZ SOUND SYSTEM

ASKOREN ARTEAN-Total diva

ASKOREN ARTEAN "TOTAL DIVA" (RLPmix records)

Diskak azaleko irudiarengaitik erosiko balira diska honek ez luke arrakasta haundiegirik izango. Portada ikusita diskan entzun daitekeen musika nolakoa den asmatzen duen jendea omen dago, hori diote behintzat. Jende askok dantza musika guztia errepikakorra, edukirik gabea eta hotza dela pentsatzen du oraindik ere eta beste askorentzat, dantza, gauarekin, mugimendu mekanikoekin eta nerbio sistema kitzikatzen duten sustantziekin loturik dago ezinbestean. Soul, funk eta disco musikaren urrezko aroa aspaldi igaro omen zen eta house musika, estilo horien oinordeko txiroa besterik ez da. Gaur egun ez omen dago lehen bezalako abeslaririk; soul, jazz eta disco musiken urrezko ahotsak aspaldi desagertu zirelako. Beltzak basatiak dira, ijitoak zikinak, alperrak eta lapurrak eta euskaldunak... lehen langileak eta fededunak baziren ere, orain...

ARITZ SOUND SYSTEM

ASKOREN ARTEAN-Undiscovered Aspects 2

ASKOREN ARTEAN Undiscovered Aspects 2 (Undiscovered recordings)

Geroz eta gehiago erakartzen gaituzte estilo zehatz batean kokatu ezin daitezken diskak. Ohikoak dira erritmo baten aitzakipean musika estilo errepikakor batez osatutako bildumak eta gutxi dira, erritmo zehatz batean oinarrituta baino giro bat bilatzen duten diskoak. Undiscovered Aspect izenpean kaleratu berri den diska honetan garai eta erritmo desberdinetako proposamenak aurkituko ditugu; Emerson Lake & Palmer-etik hasita Rinocerose edo Lo Fidelity All Stars bezalakoetara eta tartean, John Martyn, Grace Jones, Tim `Love Lee, Sylk 130 eta antzeko martiztarrak. Horrelako popurria jasotzen duen diska bikoitzari lotura ematea ez da batere errexa baina onartu beharra dago Angelo `Funkmaster Tardiok lan txukuna egin duela. Berak dioen bezala: Diska sikodelia berrira eta jendeak chill out deitzen duen musikaren oinarrietara egindako bidaia da

ARITZ SOUND SYSTEM

ASKOREN ARTEAN-Verve remixed unmixed 2

Askoren Artean "Verve remixed/unmixed 2" (Verve)

Zubi lana. Horrela definituko genuke Verve remixed/unmixed bezalako diskek betetzen duten funtzioa. Verve jazz musika banatzailerik garrantzitsuenetakoa da. 20. hamarkadan (erres esaten da) hasi eta gaurdaino grabatutako jazz musikaren parte garrantzitsu bat zigilu honen bidez kaleratua da. Ververen katalogoa izugarria da eta azken urteotan, ate berriak zabaldu zaizkio hautsez betetzen ari ziren diska askori. Musika elektronikoak izan duen gorakada dela eta mundu horretan ezagunak diren musikari, produktore eta diska jartzaile askok (Funky Lowlives, Felix Da Housecat, Miguel migs, Fila Brazillia, Mr. Scruff, Dj Spinna, e.a.) Ververen altxorretan arakatu eta altxor horiekin harribitxi berriak osatzeko aukera izan dute. Diska bilduma honetan, aurrekoan bezala, jazz musikaren klasikoak (edo ez) diren kantuak batetik eta kantu horiei egindako nahasketa berriak entzun ahal izango ditugu eta horrela, jazz klasikoaren maitaleek musika elektronikoaren mundua uste bezain beldurgarria ez dela ikusiko dute eta era berean, aparailu elektronikoaen defendatzaile sutsuek, neurri haundi batean, gaur egungo musikak sustraiak non dituen ezagutzeko aukera izango dute. Topikoak apurtu, mugak zabaldu eta elkarezagutu eta gozatu.

ARITZ SOUND SYSTEM

ASKOREN ARTEAN-champs elysees cafe 2

Askoren artean Champs-lyses Caf 2 (Wagram)

Azken aldian egin ditugun diska kritika asko ikusita Parisko kafetegi eta jatetxe garestien ohiko bisitari garela pentsatuko dute askok. Komisio edo sari ekonomikoa dugula agian? Ez bata ezta bestea ere. Ez dugu kaferik hartzen eta etxetik kanpo afaltzerakoan herriko taberna xumean bokata goxoa normalean. Dirua edukita ere ez genuke horretan gastatuko. Egia da ordea azken aldian perretxikoak bezala ugaritu diren bilduma sesio hauetako asko gurera iritsi direla eta erakusten duten maila altuagatik aipamena merezi dutela uste dugu. Normalean musika estilo bakarrean oinarritutakoak izan ohi dira eta amankomunean, Parisko jatetxe eta kafetegiei dagokionez behintzat, jazzarekiko maitasuna dute, erritmo elektronikoekin uztartuta. Oraingo honetan, jazza lotura bada ere, musika elktronikoaren barruan dauden estilo desberdinak azaltzen dira; lounge-downtempo erritmo lasaiak hasieran, elektro-hip-hopa ondoren eta techno house doinuak amaitzeko. Dotore.

ARITZ SOUND SYSTEM

CAÑAMAN-Fronteras

CAAMAN "Fronteras" (Boa/Nice Time)

Dato objetiboak: Madrilgo Caaman reggae taldeak Jamaikan grabatu du diska berria. Gussie Clarke izen haundiko soinu teknikari eta ekoizlearen grabazio estudioan, Anchor studios delakoan, egin dute grabaketa. Produkzio lanetan Sly Dunbar eta Robbie Shakespeare-ren (reggae bateri eta baxujole mitikoak) laguntza izan dute eta diskan, besteak beste, Anthony B, Marcia Griffith, Capleton, The Tamlins, Louie Kulcha edo Malijah abeslarien eta Dean Fraser, Nambo Robinson edo Bongo Herman bezalako musikari ezagunen parte hartzea izan dute. Horrelako baldintzetan reggae ona egitea errexa dela pentsatuko dute askok. Ez dut uste. Eta emaitza? Gustatzen zait. Gustatzen zait diskoaren azala, gustatzen zait diskaren soinua, gustatzen zait Freddie Mc Gregorren bertsioa, gustatzen zait kantu batzuen letra, gustatzen zait kolaboratzaileen parte hartzea, gustatzen zait pop kutsuko reggaea (nere neurrian), gustatzen zait taldekoek sentimenduz egin dutela nabaritzea eta gustatzen zait diskako gauza (gutxi) batzuk gustatu ez izana. Azken finean, ez al da ba gusto kontua?

ARITZ SOUND SYSTEM

CLAUDE CHALLE & FRIENDS-JE NOUSS AIME

CLAUDE CHALLE & FRIENDS JE NOUSS AIME (Chall`OMusic)

Gure artean gustiz ezezaguna bada ere, frantses estatuan, izen haundiko diska jartzailea da Claude Challe. Buddha-Bar edo Nirvana bezalako jatetxe-kafetegi famatuen bildumen egilea da beste askoren artean. Ekialdeko herrietan egindako musika tradizionalaren maitale sutsua da nahiz eta bere sesio-bildumetan herrialde horietako musikariak baino, musika horien ikutuak dituzten mendebaldeko musikarien doinuak gehiago erabiltzen dituen. Oraingoan, batetik, berak konposatutako kantuak aurkezten dizkigu eta diska bikoitz honen bigarren konpaktoan kantu horiekin osatutako nahasketak edo erremixak aurki daitezke. Diska entzunda bake kosmiko etengabean bizi diren hippy happy yupiak datozkigu burura. Mamia baino azaleko itxura gehiago du honek.

ARITZ SOUND SYSTEM

DIANA KRALL-The Girl in the other room

DIANA KRALL The Girl in the other room (Verve)

Diskoen azalaren arabera diskoak nolakoak diren esateko gai omen zen pertsona ezagutu nuen behin. Kuriosoa ezta? Frogan jarri nuen eta diska batzuk erakutsi ondoren bere iritziaa ezagutu nahi nuela esan nion. Diska azalak esku artean bueltaka ibili eta gero azala eta edukiaren artean erlaziorik topatzen bazuen sorte kontua izango zela pentsatu nuen. Diana Krall-en diska berriko azala ikusita zer esango luke imaginatzen dut orain. Txurroak bezala musika industriak kaleratzen dituen neska polit horietako baten diska dela esango luke zihurrenik. Aurrez egindako erritmo errepikakor eta pasteleroen gainean teknologiaren laguntzaz abesten duen ahots xoxoa duen emakumearen irudia duela esango luke agian eta oraingoan ere, ez luke asmatuko. Aurreritzien tragedisa. Diana Krallen musika, irudiaren gainetik bihotzarekin egindako musika delako, jazz bokalaren tradizio onenaren jarraitzaile eta aparteko jazz musikariekin grabatua. Elvis Costelloren maitasunaren laguntzaz konposatutako letrekin, tom Waits, Joni Mitchell eta More Allisonen bertsioekin eta hori gutxi balitz, Tommy LiPumaren produkzioarekin.

ARITZ SOUND SYSTEM

DON LETTS PRESENTS THE MIGHTY TROJAN SOUND

DON LETTS PRESENTS...THE MIGHTY TROJAN SOUND (Trojan)

Geroz eta ohikoagoak bihurtu dira musika munduan ezagunak diren musikari-abeslariek osatutako diska bildumak. Ez dira bertsioak ezta diska sesioak ere, bere gusto pertsonalen arabera osatutako diska bildumak dira. Gure artean oso ezaguna izan ez arren, Don Letts urteak darama Ingaleterran reggaea eta reggaearen mugak apurtzen dituzten doinuak ezagutarazten. Trojan disketxeak bere katalogo amaigabearen ateak ireki dizkio eta aukeratzen dituen kantuekin diska bikoitza osatzeko lan neketsua jarri dio. Lehenengoan, abeslari eta deejayek egindako kantuak aurkituko ditugu gehienak ( 70. hamarkadako klasikoak gehienak) eta bigarrena berriz dub eta instrumentalekin osatu du. Ideia eta bilduma bera oso onak izan arren kantu berdinak behin eta berriro errepikatzearen arriskua dakar.

ARITZ SOUND SYSTEM

FILA BRAZILLIA-Another Fine Mess

FILA BRAZILLIA Another Fine Mess (Azuli)

Batzuentzat idoloak diren musika egileen sustraiak eta inspirazio iturriak ezagutzeko diska aproposak eta besteentzat berriz, musikari edo abeslari edo produktore zein DJ ezagunen izen ezagunak aitzaki hartuta diskoak saltzeko teknika berria. Bata zein bestea zuzen dagoela pentsatuta ere, egia da, azken aldian, ohikoak bilakatu direla musika munduan ezagunak direnen diska bilduma sesioak ( derrigorrezko zerbait bihurtu dela esango lukete askok). Oraingo honetan, Fila Brazilliako beteranoei iritsi zaie txanda. Urteak dira Fila Brazilliakoak gaur egun horren ezagunak diren lounge/downtempo erritmoekin jokatzen hasi zirela. Oraindik izen ponpoxo hori ere asmatua ez zegoenean beats eta erritmo zaharren berrikuspena egiten hasiak ziren eta horrelako doinuak jasotzen dituzten hainbat diska kaleratuak zituzten ordurako. Oraingo honetan, gustoko dituzten hainbat kantuekin osatu dute bilduma, dantzarako sesio xuabe modura antolatu dute eta entzun daitezken proposamenen aniztasuna ikusita (Xavier Cugat, Bushy, Pepe Deluxe, Naab, Yello, Goldfrapp; Tutto Matto, e.a.) ez zaizu aspertzeko denborarik geratuko. Ahotsik gabeko beats zoroak.

ARITZ SOUND SYSTEM

FULL FLAVA-Color of my soul

FULL FLAVA "COLOUR OF MY SOUL" (Dome records)

Arimaren kolorea... baina ba ote du arimak kolorerik? Gaur egun zoritxarrez musika industri boteretsuak komunikabide nagusien bidez zabaldutako soulak diruaren kolorea du. Kate produkzioaren abiaduran sortutako azukre finduko ekoizpenak kristalezko ahotsaz igurtziak. R&B deitzen diote batzuk. AEBetan miloika dolar mugitzen dituen musika izan arren ez dute rapak, zabor janariak edota Caca Colak duen zabalkundea izatea lortu, oraingoz behintzat. Europa mailan fuck Ingland da soul zaletu gehien biltzen dituen lurraldea eta bertakoa da Full Flava proiektua. Izen horren atzean izkutatzen diren ekoizleek irlako emakumezko soul abeslari kotizatuenak bildu dituzte; Carleen Anderson, Ce Ce Peniston, Beverlei Brown... emaitza ordea ez da espero zitekeen bezain ikusgarria. Neurrian dastatu beharrekoa.

ARITZ SOUND SYSTEM

Fila Brazillia-B2

Fila Brazillia "B2" (Twentythree Records)

Fila Brazilliaren diska hau ez da Fila Brazilliarena, edo bai. Fila Brazilliaren diska honetan ez da Fila Brazilliaren musikarik entzuten, edo bai. Urteak daramatza Fila Brazilliako bikoteak (S.Cobby eta D. McSherry) diskak kaleratzen eta gehienetan beraiek konposatutako musika entzun daiteke. Musika egiteaz gain, diska jartzaile lanetan aritzen dira eta horretaz gain, besteek egindako musika bernahastu egiten dute. Hau bai ausardia dutena eta hori gutxi balitz, orain (eta ez da lehen aldia) besteen musikarekin egindako nahasketekin osatutako diska salgai jarri dute (eta gainera diska bikoitza da). Ez pentsa estilo berdina lantzen duten talde eta musikariak aukeratu dituztela, ez horixe. Fluke, Jose Padilla, The Truth, Cal Tjader, Sven Vath, UFO, Radio Zumbido, Jaffa, Soulstice, Tosca, Mellow... eta hori gutxi balitz, reggae klasikoak elektronikarekin nahasten ausartzen den Select Cuts/Echo Beacheko nahasketa bat bernahasi egin dute. Noraino iritsiko ote gara? Fila Brazilliako hauek ez dute lotsarik. Herriko apaizak sakrilegioa dela esango luke eta zihurrenik infernurako txartelak banatuko lizkieke. Orain hasi naiz infernua eta tentazioaren kontu horiek ulertzen.

ARITZ SOUND SYSTEM

GENETIC DRUGS-The afro pharma experience

GENETIC DRUGS "THE AFRO PHARMA EXPERIENCE" (African dance)

Musika soilik dibertimendurako eta aisialdirako tresna bezala ikusten dutenen aurrean zoritxarrez geroz eta gutxiago gara musikaren ahalmenak askoz ere gehiago direla defenditzen dugunok. Ahalmen horien artean gaixotasunei aurre egiteko sendabelar funtzioarena dago. Hori bai, musikaren botikak eragina izan dezan musika zaletua izatea komeni da; zenbat eta zaletuagoa izan orduan eta eragin haundiagoa izango bait du. Musika guztiek ordea ez dute ahalmen berdina eta entzule guztiei ez die berdin eragiten. Genetic Drugs kolektiboko diska jartzaile eta musikariek asko dakite musikak duen sendatzeko ahalmenaz eta prestatu duten azken botikan techno, dub eta drum&bass osagaiei afrikar musiken ikutua gehitu diote. Nahasketa gogor samarra izan daiteke baina `betiko doinuetaz aspertuta nago´ edota `musika guztia berdina iruditzen zait´ gaixotasuna dutenentzat oso gomendagarria da

ARITZ SOUND SYSTEM.


Epaile jainko aditu adiktoak dio: 4

GENTLEMAN-Runaway EP

GENTLEMAN "RUNAWAY/EP" (Four Music Production)

Gauzak sinplifikatzeko joera haundiegia dugu askotan. Txuria ala beltza. Txuria; elurra, garbia, bakea, aitasantua eta gizaki aurreratuenen kolorea. Beltza berriz; iluna, zikina, atzeratua eta basatia. Diru beltza, merkatu beltza, txapapotea...Ona eta txarra. Zintzoa eta gaiztoa. Beltzak atzeratu eta basati xamarrak dira baina korrika egiten eta baloia saskia sartzen "los putos amos" dira eta nola egiten dute dantzan! Kantatzeko ere nahiko onak dira bereziki txurroak badituzte, petak erretzen badituzte eta gaizto aurpegia jartzen badute; orduan bai "la ostia" direla. Gentlemanen maxi berria "Journey To Jah" diskaren jarraipena da. Diskan egin bezala, oraingoan ere, gaur egungo goi mailako reggae abeslariez inguratu da (Capleton, Glen Washington, Luciano eta Taffari) eta jamaikar produktoreen base erritmikoen laguntzaz, oso diska interesgarria lortu du, maila altukoa. Gentleman Alemanian bizi da, ez ditu txurroak, ez dakit petak erretzen dituen eta azal zuria du baina horretaz ez zara bere argazkia ikusi arte konturatzen.

ARITZ SOUND SYSTEM

HIM-Many in High Places are not well

Him Many in High Places are not well (Fat Cat)

Egun osoa gauzak definitzen, sailkatzen igarotzen dugu. Hau honelakoa da eta hori horrelakoa. Niri honelako gauzak gustatzen zaizkit eta horrelakoak ez zaizkit gustatzen. Zer da hau eta zer da beste hori? Ah bai? Honelakoa bada entzungo dut baina horrelakoa bada ez. Nungoak dira? Eta zer egiten dute? Onak dira? Gustatuko zaizkit? Jarri pixka bat. (Lehenengo kantaren hamar segundu eta gero). Kendu kendu, nahikoa dut. Him taldearen diskarekin gerta daiteke. Lehen aldia da izena entzuten duzula, ez dakizu talde, bakarlari, orkesta edo konputagailua den. Ez dakizu nungoa den eta ez dakizu nola definitu egiten duten musika. Batzuetan jazzaren antza hartzen diozu, Afrika gogorarazten dizuten gitar eta perkusioak besteetan, erritmo kaxak agian, afrobeat? Dub, pop, arabiar doinuak? Galduta zaude. Lehen entzunaldia korrika eta presaka egiten baduzu galduta zaude. Denbora behar du honek. Lasai hartu eta berriro saiatu zaitez. Entzunaldi batzuk eta gero galduta jarraitzen baduzu hobe duzu beste bidetik saiatzen bazara, urte batzuk barru agian?

ARITZ SOUND SYSTEM

HIRAM BULLOCK-Try livin it

HIRAM BULLOCK "Try livin it" (Esc records)

Jazz klasikoaren jarraitzaile sutsu batzuentzat Hiram Bullock-ek egiten duena ez da jazza izango. Funk klasikoaren jarraitzaile sutsu batzuentzat Hiram Bullock-ek egiten ez duena ez da funkia izango eta soul klasikoaren jarraitzaile sutsu batzuentzat Hiram Bullockek egiten duena ez da soula izango. Eztabaida amaitezina izan daiteke. Eta gainera, zer da jazza, zer da soula, zer da funkia, zer da jarraitzaile izatea, zer da sutsu izatea, zeintzuk dira batzuk, zeintzuk besteak eta zergatik esaten dituzte horrelakoak zerbait edo norbait kritikatu nahi dutenean hori negatiboa balitz bezala? Eztabaida honetan sartzeko denbora bilatzen dugun bitartean Hiram Bullock eta bere lagunen Musika ederrarekin gozatzen jarraituko dugu. Eskerrak musika adituek horrelako eztabaida sakonetan murgiltzen diren bitartean Hiram Bullock eta berarekin diskan parte hartu duten musikari apartek (Will Lee, Ricky Peterson, Tom Malone, Frank Davis, Charley Drayton, e.a.) Musika ederra egiten jarraitzen duten. Eztabaidaren zurrumurruak ez dezala gure harreta desbideratu.

ARITZ SOUND SYSTEM

JAH KINGDOM-JAH NEVER LET US DOWN. Vol.34

JAH KINGDOM "JAH NEVER LET US DOWN. Vol.34" (Jah kingdom tapes)

Mixtape. Nork ez du noizbait gustoko dituen kantuekin zinta bat grabatu? Musikarekiko duen adikzioaren edota eskura dituen baliabideen arabera kantu horiek nahastutak grabatzeko ausardia izango zuen batek baino gehiagok. Eta ausardiaz gain lotsa gutxi dutenek ere salgai jarriko zuten noizbait bere nahasketa-Dj-sesio mundiala. Teknologien "aurrerapenei" esker kasetean egindako grabazio horiek KDan egiten dira orain. Euskal Herrian, horretan ere, atzerapen haundia daramagun arren, gure inguruko herrialdeetan ohikoa da "mixtape" delako hauek argitaratzea. Dirua eta aukera dutenek legalki egiten dute, dirurik eta baliabiderik ez duten gixajoak berriz gaizkile bihurtzen dira. Jah Kingdom estatu frantseseko reggae sound systema da eta bere eskura iristen diren reggae singel-nobedade guztiak modu industrialean nahasten ditu. Artisautza musikala desagertzeko zorian dago.

ARITZ SOUND SYSTEM



Epaile jainko aditu adiktoak dio: 4

JAZZANOVA-REMIXED

JAZZANOVA REMIXED (Jazzanova-Compost)

Nork esango luke gaur egun egiten den musika interesgarrienetakoa Alemaniatik iritsiko zela. Eta zergatik ez? AEB eta Ingaleterrako abeslari, musikari, Dj eta produktoreak (batzuk besteak baino gehiago) dira komunikabideetan ohiartzun haundiena dutenak baina munduko edozein txokotan aurkituko ditugu gauza interesgarriak. Jazzanovako jendea besteen musika nahasten hasi zen eta orain, besteak dira beraiek konposatutako kantuak bernahasi dituztenak. In Between diskako kantuak Dr. Rockit, Stereolab, King Britt, Kyoto Jazz Massive, Jazzy Jeff edo Yukihiro Fukutomi bezalako jendearen esku jarri dituzte eta bakoitzak bere erara moldatu ditu. Emaitza ikusgarria lortu dute eta nahasketekin osatutako beste diska askorekin berehala aspertzeko arriskua baldin badago, honekin orduak emango ditugu eta aspertu beharrean, entzunaldi bakoitzari gozagarri berria atzemango diogu. Maixulana.

ARITZ SOUND SYSTEM


LLOYD-BROWN-AGAINST THE GRAIN

LLOYD BROWN "AGAINST THE GRAIN" (Jet Star)

Lloyd Brown urte asko darama reggaea abesten eta hala ere, ez da abeslari famatua (ezta reggae zaletuen artean ere). Lloyd Brown urte asko darama reggaea abesten baina ez da errexa bere diskak aurkitzen (diska gehiago dituen ere ez dakigu). Lloyd Brown ezagunagoa da beste abeslarien disketan ahots laguntzaile lanak egiten dituelako eta agian horregaitik, bakarlari bezala kaleratu duen diska honetan, beste abeslarien bertsio ugari entzun daitezke; Jimmy Cliff, Desmond Dekker, Aswad, Dennis Brown... eta beste klasikoen bertsioak. Horregaitik ere, agian, ahots laguntzaile asko izan ditu eta horietako gehienak, Ingaleterran arrakasta duten abeslariak dira; Don Campbell, Enyonam, Omar, Bitty Mc Lean, Sylvia Tella... Eta agian, Ingaleterran maitasun reggaeak, lovers rock delakoak, jarraitzaile asko dituelako estilo horretako kantuz jositako diska da. Ez gaude zihur.

ARITZ SOUND SYSTEM

LORD KAYA & The Kinky Coo Coo-Co Tonga Tonga

LORD KAYA & The Kinky Coo Coos Co Tonga Tonga (Liquidator)


Zenbat alditan entzungo genuen reggae musika guztia berdina dela eta itxuraz oso erreza izan behar duela musika hau jotzea. Hori uste dutenak saiatu ote dira noizbait instrumentu bat jotzen? Eta dagoeneko instrumentu bat jotzen dakitela uste badute ere saiatu ote dira noizbait reggae musika egiten? Hector Lord Kaya eta bere lagunek 2000. urtean hasi ziren saiatzen eta jamaikar musika egitea errexa dela diotenei zer erantzuten dieten entzutea gustatuko litzaiguke. Lehenenik eta behin, reggae musika jotzeko ez da nahikoa musikaria izatea eta reggae musikaren zaletu sutsua izateak ere ez dizu trebezi berezirik zihurtatzen, nahiz eta saiakeran asko lagundu dezakeen. Hector eta bere lagunek lehen pausoa eman dute (eta ez da edonolako pausoa gainera). 60. hamarkadako ska-reggae klasikoen bertsioekin osatutako diska grabatu dute (The Maytals, Wailers, Millie, Jimmy Cliff, Desmond Dekker eta abar) eta horretarako Dr. Calypso katalandar talde historikoaren laguntza izan dute. Ausardia behintzat ez zaie falta Bartzelonako hamairu gazte hauei baina zoritxarrez horrekin ere ez da nahikoa. En aquesta vida no hi ha res impossible, si tho proposes i hi dediques temps, qualsevol cosa s possible. Animo!

ARITZ SOUND SYSTEM

Lone Ark-Countryside Sounds from the Nazarin Street

Lone Ark "Countryside:Sounds from the Nazarin Street" (Brixton Records)

Martxa honetan Lee Perry, Derrick Harriot, Linval Thompson, Augustus Pablo, Sly & Robbie eta antzeko musikari/ekoizle maixuekin batera zerrendatu beharko dugu Roberto Sanchez reggae musikan garrantzi berezia izan duten izenak gogoratzeko orduan. Gehiegizkoa dela esango dute askok baina ez da txantxetako gauza Robertok eta bere lagunek egiten ari diren lana. Egia da, hasieran aipatutako musikari/ekoizleek egindakoa mundu mailako ohiartzuna izan duela eta Roberto eta bere lagunek egiten ari direna geografikoki mugatuagoa dela baina egia da, era berean, Europa mailan orokorrean eta estatu espainiarrean zehatzago, izugarrizko lana egiten ari direla jamaikar doinuak duintasunez zabaldu eta ezagutarazteko orduan. Urteak dira Robertok reggae musikarekiko duen pasioa praktikan jartzen hasi zela; Lone Watti, Better Collie, Basque Dub Foundation, Sound Dealers, The Nortones, Loud & Lone... eta orain bere altxor pertsonalaren kutxa zabaltzea erabaki du. Aize freskoa 70. hamarkadako reggae zaletuontzat eta musika ederra orohar estiloen gainetik musika maite dugunontzat. Begirunea eta maitasuna. Mila esker.

ARITZ SOUND SYSTEM

MATE & MATOS-Enter our world

MATEO & MATOS "Enter Our World"

Ongi etorriak John Mateo eta Eddie Matosen mundura! Ongi etorriak gaur egun mundu mailan ospe haundienetakoa duten bi d.j. hauen etxera! New Yorkeko Body & Soul eta arrakasta haundiko antzeko dantzalekuetan diska jartzaile lanetan ibiltzeagatik ezagunak dira Mateo & Matos eta mundu mailako d.j. famatu askoren antzera, eta gaur egungo makinek eskeintzen dituzten aukeretaz baliatuz, besteek egindako musika jartzetik musika sortzaile izatera pasa dira. Etxeko atea zabaldu eta jazz, funk, soul, disco eta afrikar erritmoekin apaindutako altzariak topatu ditugu nonahi; house musikaren dekorazio klasikoak agindu bezala kokatuak. Aukeran, prefabrikatutako altzariak baino nahiago eskuz egindakoak. Denbora, diru eta gustu kontua izan ohi da.

ARITZ SOUND SYSTEM



Epaile jainko aditu adiktoak dio: 3

MC SOLAAR-Mach 6

MC SOLAAR Mach 6 (Sentinel Quest)

Frantses estatua izango da zihurrenik Europa mailan rap musikaren jarraitzaile sutsuenak dituena. Urteak dira AEBetako kaleko doinuak frantziako gazteriaren artean errotu zirela eta erro horietatik jaiotako zuhaitzak adar oso desberdinak ditu orain. Mc Solaar komertzialki arakasta haundiena izan duen adarrean aintzindarietakoa da eta horrek zama haundia ekarri dio. Urteak pasa eta diskak kaleratzen ditu, edozein musikari-abeslarik nahiko lituzkeen baliabide guztiak ditu, grabazio estudio onenak, nahi aina laguntzaile eta kolaboratzaile, lasai grabatzeko denbora eta urteetan zehar irabazitako esperientzia, luxuxko aurkezpena, diska hirukoitza (2cd+dvd), erremixak, kolorezko argazkiak eta mundu mailako banaketa zihurtatuta, diska txukuna osatu du, anitza eta aberatsa, erres entzuten dena, goxoa... eta hala ere, lehen diskoarekin sentitzen genuena ez dugu orain sentitzen. Kezkatzen hasiak gara.

ARITZ SOUND SYSTEM

MEDITATATIONS-Guidance

THE MEDITATIONS "GUIDANCE" Makasound

Maka, jamaikarrek erabilitako hitza da. Ingeles hiztegi garbian ez da azaltzen baina jamaikarrentzat esanahi zabaleko hitza da. Maka; ziztatu, akuilatu, mokokatu, hozkatu eta ausitzen duen zerbait omen da, arantzatsua, bizia, zorrotza, garratza eta mikatsa. Makasound zigiluak ezaugarri horiek dituen reggaea jasotzen omen du. Nik ez nuke horrenbeste esango. Zorionez, azken urteetan Jamaikako altxorrak berreskuratzen lan izugarria egiten ari diren disketxeak sortu dira eta bere garaian singel edo LP formatoan kaleratutako diskak iluntasunetik atera eta argitara ekarri dituzte berriro. 70. hamarkadan egin zen reggae onenaren maitaleentzat derrigorrezkoa da Blood & Fire, Pressure Sounds edo Maka zigiluen diska guztiak eskuratzea. Guztiak. Ez da txantxa.

ARITZ SOUND SYSTEM


Epaile jainko aditu adiktoak dio: 4

MICHAEL BRECKER QUINDECTET-Wide angels

MICHAEL BRECKER QUINDECTET "WIDE ANGLES" (Verve)

Michael Breckeren saxoa tenorea da. Urteetako arnasaldien ondoren izar haundian bihurtu da orain (anaia ere izar haundia du). Michael Breckeren saxoak diska kaleratu du eta bera bezain adimentsu eta trebeak diren lagunekin elkartu da; hor daude tronpeta eta tronboia, frantses haizea, ingelesa, txirula baxua eta altua, klarinetea, oboea, biolin parea eta biola. Guztiak dira maixu eta guztiek dute hizkera fina. Verve jauregian bizi dira goi mailako jazz musikaren odola dutenek horrela behar dutelako eta elkarrekin hizketan hasten direnean denek harreta haundiz entzuten dute. Nik ere entzuten ditut baina ikasketa gutxi ditudalako edo, ez ditut ondo ulertzen. Saiatzen naiz baina ezin. Zorabiatu egiten naiz. Agian helduagoa naizenean edo... bitartean ikasten jarraitu beharko dut . Bob Marley marihuana erretzearekin batera hasi omen zen jazza ulertzen...

ARITZ SOUND SYSTEM

MIKEY SPICE-My way

MIKEY SPICE "MY WAY" (Jet Star)

Amak ez du ulertzen. Nola liteke itxuraz normala den mutil bati reggae musika horrenbeste gustatzea? Nola liteke bere bizitzako urte mordoa, gehiegi bere ustez, erritmo errepikakor berebera behin eta berriro entzuten igarotzea? Ez al zara aspertzen? Aspaldi esan nion reggae musika gitar edo teklatuaren hots errepikakor bat baino askoz ere gehiago dela edo nire buruak hori uste du behintzat. Aspaldi esan nion reggae izenarekin ezagutzen den musikaren barruan adar asko daudela eta adar bakoitzak kolore desberdinetako ostoak dituela. Osto horietako bati Lovers Rock deitzen diote adituek eta oinarrian maitasun kantu goxoez osatutako reggaeari deitzen zaio, soul musikaren kantatzeko era duena eta gaur egun, nire gustorako, azukre gehiegi duena. Mikey Spice izan daiteke adibide txukuna. Amak mutil normala ez naizela eta izan nahi ez dudala daki orain. Reggae musikaz ez dugu aspaldi hitzegin.

ARITZ SOUND SYSTEM



Epaile jainko aditu adiktoak dio: 4

MORODO-COSAS QUE CONTAR

MORODO COSAS QUE CONTAR

Morodo, Jamaikako toasterren tradizioari jarraiki sortutako abeslaria da. Toasterrak, Jamaikako sound system edo dantzaleku mugikorretan festa animatzen zuten hizlariak ziren, reggaearen eboluzioaren ondorioz sortutako gaur egungo ragga eta dancehall abeslarien aintzindari (baita rap abeslariena ere). Jamaikar gazteen artean sukarra eragiten duten ragga eta dancehall abeslari gehienak, salbuespenak salbuespen, kotxe dotoreak, urrezko pitxiak, ankatartekoa eta silikonazko titidun panpinak besterik ez dituzte buruan. Sexuaz eta diruaz modu arinean eta besteekiko errespetorik gabe hitzegiten dute jostailuzko pistola esku artean dutela. Morodok ez du bide hori jarraitu nahi. Morodok gauza asko ditu kontatzeko eta bere mezuak reggae, rap eta ragga doinuekin zabaltzen ditu. Maitasunaz, errespetoaz, marihuanaz, erlijioaz eta beste gauza askotaz hitzegiten digu eta guk harretaz entzuten diogu nahiz eta esaten dituen gauza askorekin ados ez egon.

ARITZ SOUND SYSTEM

Marcos Valle-Contrasts

Marcos Valle Contrasts (Far Out recordings)

Marcos Valle da gaur egun Brasilgo abeslarien artean gehien atsegin dugunetakoa. Marcos Valle ez da Brasilgo musika historian ohorezko tartea izango duen horietakoa, ez da famatuenen artean gogoratuko eta ez du ezer berririk asmatu. Hala ere, bossa novaren tradizioa eta erritmo elektronikoen arteko maitasun/gorroto harreman horretan paper garrantzitsua jokatu/tzen du. 90. hamarkadan inor gutxik harreta eskeintzen zionean Londonen indar hartzen hasi zen acidjazz delakoaren jarraitzaileek idolotzat zuten. Horri esker, Marcos Vallek berriro grabatzeari ekin zion eta ondorioz, azken urteotan bossa elektronikoaren kantu ederrenetakoak entzuteko aukera izan dugu. Marcos Vallek ez du esperimentatzen eta ezta gehiegi arriesgatzen ere baina ez du zergatik. Kantu ederrak egin eta bertsionatzen ditu eta guk bere musikarekin gozatzearekin nahikoa dugu. Azken diska honetan, bere kantuekin batera 4 Hero, Bugz In The Attic eta Buscemik egindako nahasketa edo erremixak entzuteko aukera dugu.

ARITZ SOUND SYSTEM

NITIN SAWHNEY-ALL MIXED UP

NITIN SAWHNEY ALL MIXED UP

Etorkin hitza irudi negatiboz inguratutako hitza da. Komunikabideetan egunero azaltzen den hitza da eta gehienetan, guztietan ez bada, albiste txar baten barruan kokatzen da etorkin hitza. Musikaren esparruan berriz, etorkin hitza, aberastasun eta aniztasunaren pareko da eta gaur egun, kultur desberdinen elkarezagutza eta elkarlanaren ondorioz sortutako doinuak dira musikari haize freskoa eta berria ekarri diotenak. Nitin Sawhney, pakistandar etorkinen semea, Ingaleterran bizi da eta bertan ematen den aniztasun kulturaletik edan du. Musikalki sustraiak Pakistango musikan baditu ere, kultur askotako iturriak dastatu ditu eta zapore desberdinen nahasketa horrekin edari berria eta freskoa osatu du, gehienon egarri musikala asetzeko balio duena. Orain aurkezten dugun diska honetan, Nitin Sawhney-ren kantu berriekin batera, kantu zaharren nahasketa berriak (musika elektronikoaren esparruan lan egiten duten ekoizle ezagunek egindakoak; At Jazz, Mj Cole, Quantic eta abar) eta Nitin Sahwney-k diska jartzaile lanetan osatutako sesioa entzun ahal izango dugu. Etorkin hitzaren alde positiboak musikaren eremua gainditu dezan.

ARITZ SOUND SYSTEM

NITIN SAWHNEY-HUMAN

NITIN SAWHNEY HUMAN

Lagun batek: Nik normalean reggae musika entzuten dut baina Nitin Sawhney-ren diskak ere gustatzen zaizkit. Beste batek: Niri ere atsegina egiten zait, oso musika goxoa da erres entzuten den horietakoa eta diska lehen kantutik bukaeraraate entzun daiteke. Jertsei gorridunak dio: Aurreko diska, `Prophesy izenekoa, maixu lana izan zen, musika desberdinetako osagaiak uztartzen zituen; musika elektronikoa, brasildarra, flamenkoa... gauza zaharrak eta berriak, eta oraingoan ere bide hori mantendu du. Ondokoak: Gainera kultur desberdinetako abeslariak gonbidatzen ditu eta ingelesa nagusi den arren beste hizkuntzak ere entzun daitezke. Aurrez aurre dagoenak: Egia da, bai, niri India eta Pakistango musika sakonean ezagutzeko lehen pauso bezala balio izan zidan. Nahiz eta Nitin Sawhney Ingaleterran bizi den eta egiten duen musika batere tradizionala ez den oraindik bere arbasoen izpiritua mantentzen du. Botea duenak: Gaur gauean hemendik gertu eskeintzen du kontzertua, doain. Oharra: Euskal Herriko edozein taberna zuloan jasotako elkarrizketa, 20 urte barru agian.

ARITZ SOUND SYSTEM

RAE&CRISTIAN-Nocturnal activity

RAE & CHRISTIAN "Nocturnal Activity"

Gauzak ez dira beti diruditena. Rae & Christianen diska berria ez da berria. Dagoeneko azken aurrekoa den "Sleepwalking" diskako kantuen nahasketa berriak jasotzen ditu azkenekoa omen den Rae & Chirstianen diska hau. At Jazz, Tom & Joyce, Only Child, Faze Action, Groove Armada eta beste musikari, diska jartzaile eta produktoreek R&C-en kantuak estudioan sartu eta bere erara moldatu dituzte. Originala hobeagoa dela esan ohi da baina ez du horrela izan beharrik. AEBetan Ingaleterran baino rap eta soul hobeagoa egiten dela diote. R&C-ek rapa eta soula nahasten omen dute baina diska honetan ez dirudi rapa edo soula dagoenik. R&C-en lehen lana oso ona da eta azken hau ere. Ez du ia inork ukatuko. Estatu moderno eta demokratiko batean botereen arteko banaketa omen dago...

ARITZ "SOUND SYSTEM"

RANKING JOE-ZION HIGH

RANKING JOE ZION HIGH (Blood & Fire)

Blood & Fire zigiluaren arkeologi musikalaren lan berria. Abiaduraren eta unean uneko bizipenen gizarte honetan eskertzekoa da memoria historikoa delako hori bizirik mantentzeko egiten diren saiakerak. Musika munduan, reggaeari dagokionez behintzat, Blood & Fire zigiluari esker dagoeneko ahaztutak zeuden abeslari askoren arte lanak berreskuratzeko aukera dugu. Oraingo honetan, Ranking Joe izeneko deejay edo toaster abeslariari heldu zaio txanda. Gure artean, U-Roy, Big Youth, I-Roy edota Dillinger bezain ezaguna izan ez arren Dennis Brown edota Black Uhururen kantuekin egindako bertsioak Jamaikan zuen izen onaren erakusgarri dira. Kaleko hizkera abesti egina.

ARITZ SOUND SYSTEM

RONI SIZE-RETURN TO V

RONI SIZE RETURN TO V

Mendeetan zehar, musika, sentimenduak eta mezuak zabaltzeko tresna ezinhobea izan da. Orohar, musika, gusto kontua dela esan izan dugu baina egia da, musikak doai asko dituela eta horien artean, animo egoerak sortzearena dago. Roni Size, Jamaikar jatorriko etorkinen semea da eta Ingaleterrako Bristol hiriko giro musikaletan hezia da. Txikitatik reggae, rap, soul, pop, rock eta musika elektronikoaren iturrietatik edan du eta azken urteotan, 90. hamarkada erdialdean indartutako jungle eta drum&bass erritmoen egile aurreratua izan da. Arrakastaren argiak ezagutu eta gero, iluntasunaren itzalean babestu da berriro ere eta hainbat abeslari lagunen eskutik (Sweetie Irie, Navigator, Beverley knight, Jocelyn Brown, Dynamite...) diska borobila osatu du. Drum&bass doinuen mehategia agortuta zegoela ziotenen aurrean harri bitxia landu du d&b erritmo zoroei soula, jazza eta ragga osagaiak gehituaz. Diskaren lehen partea sesio modura antolatu du, kantuen arteko lotura eginez eta erritmoei jarraikortasuna emanez; bigarren partean berriz kantuek, bakarka, zentzua hartzen dute. Bolumen egokian, edozein droga sintetiko baino potenteagoa.

ARITZ SOUND SYSTEM

RUDE HI-FI-Barriobeats

RUDE HI-HI "Barriobeats" (Metak)

Ruderen soinu ekipoa ezagutu nahi? Ongi etorriak ska-dub-reggae-jungle-latin-
elektronikaren porrusaldara. Porrusalda? Samplesalda esan beharko genuke agian.
Rudek gustoko dituen kantuen zatiak hartu eta zati horientzako baseak egin dizkiote
Pekos eta Jama(ica)k. Diskoa, musikalki, lau ataletan banatua dago; lehenengoan 60.
hamarkadako ska doinuen gainean breakbeat baseak jarri dituzte, bigarrenean Cuba eta
hegoamerikar doinuen aitzakiarekin beats gehiago sartu diote, hirugarrenean berriz
lehen garaiko jungle erritmo eta ahots jamaikar sanpleatu ezagunekin puzzlea osatu dute
eta azkenik, reggae-dub elektronikoarekiko duten zaletasuna erakutsi digute (Manu
Chaoren Mr.Bobbyren bertsioa eta guzti). 2020.eko estiloa baino 1995ekoa dela esango
genuke guk, estilo horietan hasi berria den jendearentzat interesgarria izan daitekeena
baina reggae-dub-breakbeat eta junglela entzuten urteak daramatzanentzat
errepikakorregia agian. Dena den, horrelako diskoak gure artean kaleratzea beti da
pozgarria.

ARITZ SOUND SYSTEM

SOUND MURDERER-Wired for sound

SOUNDMURDERER "Wired for Sound"

Soundmurderer soinuaren hiltzailea da, terrorista. Musika munduko pentsamendu bakarraren kontrako gerrilaria da. Politikoki zuzena den doinuaren aurrean, desberdin entzuteko, sentitzeko eta espresatzeko eskubidea aldarrikatzen du. 90. hamarkada hasiera. Londongo auzo txiroetan jamaikar gazteek hizkuntza propioa sortzen dute; dancehall, dub eta ragga doinuen berotasunean erritmo kutxen taupadak abiadura bizia hartuko du. Zementu eta porlanezko ohianean abere berria jaio da, jungela. Festa ilegalak dira bere habiak eta irrati libreen uhinen bidez zabaltzen da ziztu bizian. Musika bakarraren ehiztariak gogor eraso dio eta kaiolan sartu eta hezi ondoren, drum&bassa sortu du. Libre mantendu diren ragga jungelak ordea hizkuntza propioa mantendu dute eta itzalean, berezko izaera fazken odol tantaraino defendatzeko prest daude.

ARITZ SOUND SYSTEM

STÉPHANE POMPOUGNAC-Living on te edge

STPHANE POMPOUGNAC LIVING ON THE EDGE (pschent)

Nolakoak diren gauzak. Zer da lehenago? Diska jartzaile lanetan jartzen den musikaria edo musika konposatzen duen diska jartzailea? Azken urteotan, musika elektronikoaren gorakadarekin batera diska jartzaile lanetan hasitako abeslari eta musikariak ugaritu egin dira eta orain, musika jartzeagatik ezagunak egin diren diska jartzaile askok etxean konposatutako doinuak diska formatoan kaleratzen hasi dira. `Caf del Mar sesioen lehen egilea, Jose Padilla, da gure artean ezagunena baina badira gehiago. Stphane Pompougnac Hotel Costes ezagunaren diska jartzailea da eta sesio-bilduma horietan lortutako arrakastari esker berak konposatutako musikarekin osatutako diska kaleratu berri du orain. Trip-hop, lounge, downtempo eta antzeko izen ponpoxoekin osatutako musika omen da; oinarrian jazza, soula, brasildar erritmoak, popa eta doinu elektronikoak. Diskan parte hartu duten abeslarien artean R:E.M taldeko Michael Stipe. Dotore.

ARITZ SOUND SYSTEM

THE ABYSSINIANS AND FRIENDS-Tree for sata

THE ABYSSINIANS AND FRIENDS "Tree of Satta" (Blood & Fire)

Musika komertzializatu eta banatzeko garaian formato desberdinak ezagutzen ditugu eta
gaur egun, oraindik, KD formatoak nagusitasuna izan arren, nork daki bihar zer gerta
daitekeen. DVDak, mp3ak eta sareak iraultza dakarte musika gorde eta banatzeko
garaian. Cdak Lpari kendu zion protagonismoa eta era berean, Lpak gauza bera egin
zuen singelarekin. Konturatu gabe, musika gordetzeko moduak, musika bera baldintzatu
dezake. Singelaren garaian kantuak zuen garrantzi osoa. Lparekin edo CDarekin berriz
hamar kantu (edo gehiago) diska berean sartzeko aukerarekin batera kantu kopuru hori
derrigor osatzera behartzen zuen eta hori kantuen kalitatearen kalterako zen askotan.
"Satta Massa Gana" kantua Abyssinians taldearen lehen kantua izan zen, singelean
kaleratu zuten 1969an eta gaur egun, sustraizko reggae musikaren ereserkia da. "Satta
Massa Gana" kantua rasta erlijioaren jarraitzaileen gida kantua da, Etiopiako Amharic
hizkuntzaren hitzak erabilita jainkoari eskerrak ematen zaizkio eta jamaikako eliz
askotan derrigorrezko kantu bilakatu da. 400 bertsio baino gehiago egin zaizkio eta
diska honetan, Sattaren zuhaitzetik jaiotako hogei osto jasotzen dira. Musikaren mugak
gainditzen dituen kantua da baina guztiaren gainetik, kantu ederra da.

ARITZ SOUND SYSTEM

THIEVERY CORPORATION-The cosmic game

THIEVERY CORPORATION THE COSMIC GAME

Joku berria proposatzen digute Rob Garza eta Eric hilton-ek: Ezetz asmatu musika dotorea egiteko behar diren osagaiak zeintzuk diren? Eta dotorea diogunean ez diogu soilik musikari dagokionez, abestien inguruan dagoen guztiaz ari gara. Pista batzuk emango dizkigute. Washington hirian bizi dira, Jamaikar etorkin kopuru haundiena duen AEBetako hiriburua. Babylon deitzen diote kapitalismoaren eredu delako. Reggae eta dub asko entzuten dute baina baita brasildar musika, jazza, soula eta rock sikodelikoa ere. Konposatzen dituzten kantuak gustoko dituzten estilo guzti horien eragina dira eta kantuok osatzeko miresten dituzten hainbat lagun gonbidatu dituzte (Perry Farrel-Janes Addiction ohia-, David Byrne Talkin Heads ohia...-, Gigi, Notch, e.a.). 1995ean taldea osatu zutenetik lau diska kaleratu dituzte eta zenbaezinak diren sesioak eta nahasketak egin dituzte. Hasieratik multinazionalen presioari muzin egin diote eta ESL disketxean kaleratzen dituzte euren lanak (baita miresten dituzten lagunenak ere). Gustoko duten musika entzuteko sailtasunak bultzatuta areto propioa zabaldu dute. Inguruan ikusten dutena kezkatzen ditu eta aldatzen saiatzen dira. Jokatu nahi?

ARITZ SOUND SYSTEM

TRÜBY TRIO-Elevator music

TRBY TRIO Elevator music (Compost)

Teknologi berrien `aurrerapenei esker askoz ere jende gehiagoren esku dago orain musika egitea. Banda klasikoaren kontzeptuak zituen `mugak (instrumentuak erabiltzeko ikasketak, entsaioak, taldekideen adostasuna bilatzea, grabaketa kosteak...) neurri batean, gainditu egin dira. Etxean egin ezazu teoriaren militanteak lau aparailuekin edozer gauza egin zitekela defendatu eta praktikan jartzen saiatu dira, hezur haragizko musikariak langabezian geratzeko arriskuan jarriaz . Truby Trioko Roland Appel eta Christian Prommerek espazio untzi batek aina aparailu erabiltzen dituzte baina jakin badakite, aparailu horiekin duten trebezia hezur haragizko musikari eta abeslariekin elkartuta emaitza askoz ere borobilagoa izan daitekeela. Lan berri honetarako gustokoak izan eta eskura dituzten tresna eta musika estilo guztiak erabili dituzte eta emaitza urteko diska kuttuna izendatzeko zenbaki asko dituen lana da; soul, jazz, funk, bossa, house, flamenkoa, afroa... Hasieratik amaieraraino gozatzeko modukoa.

ARITZ SOUND SYSTEM

TURBULENCE-The future

TURBULENCE "THE FUTURE"

90. hamarkada erdialdea, Xaymaka. Sizzla izeneko haizeteak azken urteetako reggae-slackness-zaborra popatik hartzera bidaliko du. Sing-jay estiloaren jaiotza da, ragga-roots. Reggae musikak oinarrian duen izaera iraultzailea berreskuratu eta 70. hamarkadan "Hirugarren mundu" ko musika zenaren sustraietara bueltatuko da, edo ia. Buju Banton, Capleton, Beenie Man... edota gazteagoak diren Turbulence, Warrior King, Jr. Kelly...eta abarrek reggaearen urrezko aroa berreskuratu dute, edo ia. Industriaren abiadurak ordea errepikapenerako arriskua areagotzen du eta bere garaian berritzaile eta freskoa izan zitekeena gaur egun aspergarri bihurtu daiteke. Sargoriaren ondorengo ekaitzaren zai jarraitzen dugu...

ARITZ SOUND SYSTEM



Epaile jainko aditu adiktoak dio: 3

Tapper Zukie-Musical Intimidator

Tapper Zukie "Musical Intimidator-anthology 1974-82" (Trojan)

Trojan zigiluak 60 eta 70. hamarkadetan konposatutako jamaikar musikaren katalogo
izugarria du eta azken urteotan, katalogoari hautsa kendu eta reggae musikaren arri bitxi
ugari kaleratzen ari dira berriro. Oraingoan, Tapper Zukie izeneko DJ (ez nahastu diska
jartzailearekin) eta produktoreari iritsi zaio txanda. Tapper Zukie, David Sinclair jaioa,
Jamaika eta Ingaleterrako reggaezaletuen arteko zubi lanak egin ditu. Oso gazte zela
hasi zen U-Roy eta Dennis Alcapone maixuen pausoak jarraitzen eta oso gazte zela ere,
1973an, bere amak, ghettoetan izaten zituen istiluak ekidin nahian, Ingaleterrara bidali
zuen. Ingaleterran, Bunny Leeren bitartekaritzari esker, lehen singelak grabatuko zituen
eta 1975an "Man a Warrior" lehen diska kaleratu zuen. Lortutako arrakastari esker
Jamaikara itzuli eta lurralde batetik bestera, saltoka eman ditu bere bizitzako urte
gehienak. Disketxe propioa sortu eta produktore lanetan aritua da; besteak beste, Horace
Andy, Junior Ross, Prince Alla edota Knowledge bezalako talde eta abeslariekin batera.
Orain kaleratzen den diska bikoitzan, Tapper Zukie toasterraren lehen urte
arrakastatsuenak jasotzen dira.

ARITZ SOUND SYSTEM

Tommy Mc Cook-Blazing horn tenor in roots

Tommy Mc Cook "Blazing horns. Tenor in roots" (Blood&Fire)

Blood & Fire zigiluak jamaikar musikaren altxor preziatuak berreskuratzeko egiten duen arkeologi lan izugarriari esker gozatu dezakegu dagoeneko eskuratzea oso zaila den materialaz. Oraingo honetan, Tommy Mc Cook saxofoilariari iritsi zaio txanda. Ska musikaren urrezko aroan, Skatalites taldearekin egindako lanagatik ezaguna da Mc Cook. Ezezagunagoa da ordea, skaren garaia amaituta indar hartu zuen reggae musikan egindakoa. 70. hamarkada erdi bukaerako grabazioak dira bilduma honetan entzun ditzazkegunak, garaiko roots reggaearen base klasikoak erabilita egindakoak dira eta kantu hauetako askok singelen b aldeetan kaleratu ziren soilik. Jamaikar musika gehiena kalean ikasitako musikariekin osatu bada ere, eskolatutako musikari gutxi batzuk ere badira, Tommy Mc Cook tartean, jamaikar musika jazzaren mundura gerturatu dutenak. 80. hamarkada hasieran, dancehall garaian, produkzioak merketze aldera ordurarte horrenbeste presentzia izandako haize sekzioek garrantzia galdu zuten. Reggae musika ez da oraindik galera horretaz berreskuratu.

ARITZ SOUND SYSTEM

WAGON COOKIN´-Everyday life

WAGON COOKIN "Everyday life" (Dro East West)

Jakina da euskal sukaldaritza izen haundikoa dela mundu osoan. Wagon Cookinen
lehen lana, "Appetizers", su txikian sukaldatutako plater goxoekin osatua zegoen. Jazza,
soula eta brasildar erritmoen osagaiekin sukaldatutako platerak ziren eta zoritxarrez,
Euskal Herrian oraindik ezezagunegiak diren osagaiak izanda, ohiartzun gutxi izan zuen
gure artean. Pixkanaka, zapore eta usai berrietara irekitzen ari gara orain eta dagoeneko
nazioarte mailan (musika jartzen duten diska jartzaile askok Wagon Cookinen biniloak
altxor preziatutzat dituzte) errekonozimendua lortu duten nafar hauek harreta
haundiagoa lortuko ote dute gure artean? Nork daki. Bitartean, Garaialde anaiak, musika
ona sukaldatzen jarraitzen dute eta Brasilen bizitako esperientziaekin osatu dituzte
plater berriak. Horretarako, Brasil bertako hainbat musikari eta abeslarien laguntza izan
dute eta emaitza, zapore fin eta dotorea duten hamaika plater, jarraian hartuta ere,
bazkaloste astunik utziko ez dizuna. Gozatzeko modukoa.

ARITZ SOUND SYSTEM

Youssou N´Dour-Nothing in Vain

Youssou NDour Nothing in Vain (Nonesuch)

Youssou NDour ez da soilik afrikar abeslari ezagunenetakoa. You (horrela ezagutzen dute Senegalen), ez da soilik Neneh Cherry-rekin 7 seconds kantu ezaguna grabatu zuen abeslaria. Youk, Senegalerako kaleratzen dituen disketan, mbelex estiloa jorratzen du (wolof tradizioaren dantza erritmoa da) baina atzerriko merkatura zuzendutako disketan berriz mbelex-a pop-arekin uztartzen du. Dena den, You ez da soilik bi aurpegi dituen musikaria. Seydu, Cheikh L eta abeslari eta musikari askoren diskak ekoiztu ditu baina You ez da produktorea soilik. Dakarren Senegalgo grabazio estudio modernoenak eraiki ditu, Xippi (begi irekiak) izenekoak, Jololi (soinu sortzailea) izeneko disketxea du eta Le Thiossane deritzon aretoaren jabea da, baina You ez da negozio gizona soilik. Amnistia International erakundearekin kolaboratzen du baina You ez da musikarekin gauzak aldatu daitezkeela pentsatzen duen horietakoa soilik. Kantu ederrez betetako diska goxoa osatu du, mendebaldekoen belarrietara egokitutako doinuekin eta hala ere, You ez da musika ona egiten duen musikaria soilik. Guzti hori baino askoz ere gehiago da.

ARITZ SOUND SYSTEM

ZUCO 103-One down one up

ZUCO 103 "ONE DOWN, ONE UP" (Ziriguiboom/Crammed Discs)

Zuco 103. Lilian Vieira, Stefan Schmid eta Stefan Kruger. Holanda. Diska bikoitza. Lehenengoa, Up. Zuzenean grabaturiko sei kantu. Nork dio musika elektronikoaren barruan sailkatuak diren taldeak zuzenean kaskarrak direla? Beroketa lanak egin dituzu? Zuzeneko sei kantu eta Tales of high Fever diskako hiru nahasketa berri. Dotore. Bigarren diskoa, Down. Nork dio igotzen den guztia jeitsi beharra duela? Unplugged edo era akustikoan grabaturiko bederatzi kantu. Biluzik jarri eta lotsarik ez. Futbol zaletuak direnek diote jokalari txarrek zelaiaren egoerari botatzen diotela galdu izanaren errua. Zuco 103 koek, musikari onak direnek, edozein zelaietan ondo jokatzen dutela erakusten digute. Musikaren munduan brasildar doinuen adar elektronikoaren ligan jokatzen dute eta azken urteotan, lehen postuengatik borrokan ari dira. Aposturik egin nahi?

ARITZ SOUND SYSTEM